اویان گؤزه‌لیم

بو هیجرانا یانارام ، یاتما تئز ، اویان گؤزه‌لیم
دویونجا گؤرمه‌میشم گول اوزون ، دایان گؤزه‌لیم

بیلیردین آغری‌لاریم چوخدو یورقونام قاداسی
تَلَسمه آیریلیغا سَن بیر آز یوبان گؤزه‌لیم

فلک منی ییخا بیلمیردی ، چوخ چالیشدی ییخا
آغیردی ایندی بو نیسگیل منه یامان گؤزه‌لیم

اوتاندی توپراق آلاندا قوجاغینه سنی ، آه
گونش یاتار گئجه باغریندا هئچ،هاچان گؤزه‌لیم ؟!

سیزیلتی وار قولاغیمدا ، یامان یانیر بیریسی
کیم ایله سئوگی قوروبسان، نه‌دیر نیشان گؤزه‌لیم ؟!

کیم اوخشاییر سنه سس‌سیز، منیم کیمی یاناراق ؟!
نه ائدمیشیک، بئله غملی وئره‌ک تاوان گؤزه‌لیم

باهار کؤنوللو بنووشه‌م، خزان عطیرلی بالام
آجی ناغییللی گولوم ، آی یولو دومان گؤزه‌لیم

چَکَن بیلیر نه چتین‌دیر بئله ایگید اؤلومو
اَقللی گَل یوخولاردا بیزی دولان گؤزه‌لیم
.
سلمان عبدی زاده
@salman_abdizadeh

گلین باجیم ای‌ی‌ی ...

تلسمه آچ گؤزونو ، دور ،اویان گلین باجیم ای‌ی‌ی
گلینلیگین تزه‌دیر بیر دایان گلین باجیم ای‌ی‌ی

کفن‌ نه‌چون؟! سنی آغ دوندا گؤزله‌ییردی یارین
باخ ایندی توپراق اوتانسین یامان گلین باجیم ای‌ی‌ی

کؤنولده آرزولارین چوخدو ، قبره سیغمایاجاق
قوناق گه بیرده آلیم من قادان گلین باجیم ای‌ی‌ی

طبیعتین نیظامین ظولم‌ایله قاتیبلا یامان
باهارسیز عؤمرونه آغلار زامان گلین باجیم ای‌ی‌ی

الوولانیر اوره‌گیم ،لاپ چیخیر جانیم ،اؤلورم
بو واخسیز آیریلیغا یوخ تاوان گلین باجیم ای‌ی‌ی

بو هیجرانین آجی‌سین مین غزل بیتیرمه‌یه‌جک
دور ایندی قارداشینی گؤر تالان گلین باجیم ای‌ی‌ی

آ دونیا کول باشینا ، هئچ نه‌یین قالارقی دئییل
بیلیردی سنده نه‌ وار تام یالان گلین باجیم ای‌ی‌ی

سلمان عبدی زاده
tələsmə aç gözünü,dur,oyan gəlin bacım eyyy
gəlinligin təzədir birdayan gəlin bacım eyyy

kəfən nəçün ?! səni ağ donda gözləyirdi yarın
bax indi topraq utansın yaman gəlin bacım eyyy

könüldə arzuların çoxdu ,qəbrə sığmayacaq
qonaq gə birdə alım mən qadan gəlin bacım eyyy

təbiətin nizamın zülmilə qatıbla yaman
baharsız ömrünə ağlar zaman gəlin bacım eyyy

alovlanır ürəgim lap çıxır canım ölürəm
bu vaxsız ayrılığa yox tavan gəlin bacım eyyy

bu hicranın acısın min ğəzəl bitirməyəcək
dur indi qardaşını gör talan gəlin bacım eyyy

adünya kül başına ,heç nəyin qalarqı deyil
bilirdi səndə nə var tam yalan ,gəlin bacım eyyy

salman_abdizadeh

دونیا منه

دونیا منه یئنی حیات  
بیر گؤزل آنا بوشلودور 
اَن آزی اوتوز ایل گولوش 
داغ کیمی آتا بوشلودور 

حسرت دولو سؤزلریمه
اؤزگه‌لَنمیش اؤزلریمه
غم شکلینده گؤزلریمه
مین حَکیم چارا بوشلودور

قاناد ، آرزو دیله‌ییمه
اؤز گوجومو بیلَییمه
شنلیک‌لری اوره‌ییمه
کؤنلومو تارا بوشلودور

سیندیرسام سا قفسیمی 
آلا بیلسم نفسیمی
تاپسام یاشام هوسیمی
سئوگیمی یارا بوشلودور

سلمان عبدی‌ زاده
dünya mənə yeni həyat
bir gözəl ana boşludur
ən azı otuz il gülüş
dağ kimi ata boşludur

həsrət dolu sözlərimə
özgələnmiş özlərimə
ğəm şəklində gözlərimə
min həkim çara boşludur

qanad arzu diləyimə
öz gücümü biləyimə
şənlikləri ürəyimə
könlümü tara boşludur

sındırsamsa qəfəsimi
ala bilsəm nəfəsimi
tapsam yaşam həvəsimi
sevgimi yara boşludur

səlman əbdizadə
.
@salman_abdizadeh

گونشی آسدی‌لار دارا کوچه ده

شَهَرین کؤنلونو کدر بورویوب ،داریخیر قاپ باجا ،کوچه خیابان
هرگون هر آن اؤلوب ایتیب باتیریق ،سئوگی‌لر تام آجی ،سویوق،قاداغان

یوخودایدی ائلین کیمی گؤره‌سن ؟! گونشی چکدی‌لر دارا کوچه‌ده 
 ایشیغین حسرتینده قالدیق ،آه ، آرزولار کؤنلوموزده اوْلدو تالان 

پنجره آرخاسیندا قوش وار سا،اوره‌گینده اولو کدر داشیییر
نئیله‌سین اوچماغا ماراق یوخدور، یولونو باغلاییب‌دی غملی دومان

ایتی قورددان سئچَنمیریک داها بیز ،گولوش ایله دیدیرله باغریمیزی
هئچ بیلن یوخدو کیم_کیمه، نئجه‌دیر ،هارادیر یول ، یا گلمیشیک هارادان !

قاریشیب تام بوتون معادیله‌لر ،پوزولوب دونیانین حساب کیتابی
دینمه‌ییرسه جانا گلیب تانری ،سانیرام قددی‌ده اولوبدو کامان

نه دئمک ،هئچ داریخمایین قاداسی ،سؤز وئریب‌دیر باهار بورا گله‌جک
یورقونوق سا یولو بیتیرمک اوچون ،واریمیزدیر اومودلا آزجا گومان

بئینیمیز سانجی چوخ چکیر ، نئیلک ،بئله گئدسه فیکیر گونش دوغاجاق
قارا گون‌لر سونا چاتیب بورادا ،یاراجاق ظولمتین ده باغرینی دان

سلمان عبدی زاده
şəhərin könlünü kədər bürüyüb ,darıxır qap_baca küçə xiyaban
hər gün hər an ölüb itib batırıq ,sevgilər tam acı ,soyuq ,qadağan

yuxudaydı elin kimi görəsən ?!günəşi çəkdilər dara küçədə
ışıqın həsrətində qaldıq ah, arzular könlümüzdə oldu talan

pəncərə arxasında quş varsa ,ürəgində ulu kədər daşıyır 
neyləsin uçmağa maraq yoxdur ,yolunu bağlayıbdı ğəmli duman 

iti qurddan seçənmirik daha biz ,gülüş ilə didirlə bağrımızı 
heç bilən yoxdu kim kimə ,necədir ,haradır yol ya gəlmişik haradan !

qarışıb tam ,bütün muadilələr ,pozulub dünyanın hesab kitabı
dinməyirsə cana gəlib tanrı ,sanıram qəddi də olubdu kaman 

nə demək heç darıxmayın qadası, söz veribdir bahar bura gələcək
yorqunuqsa yolu bitirmək üçün,varımızdır umudla azca güman

beynimiz sancı çox çəkir , neylək ,belə gedsə fikir günəş doğacaq
qara günlər sona çatıb burada, yaracaq zülmətin də bağrını dan 

səlman əbdizadə
@salman_abdizadeh

گؤزل قیز _gözəl qız

یانیمدان کئچنده منه باخ گؤزل قیز
باخیش‌لا منی یاندیریب یاخ گؤزل قیز
قارانلیق گئجه تک سوسوبدور خیالیم
گؤیومدن بیر اوْلدوز کیمی آخ گؤزل قیز

سنی هر گؤرنده اؤلورم یاواشجا
جانیمی سن ایله بؤلورم یاواشجا
شه‌هر آغلادیبدیر منی هر یئرینده
قاپیزدان کئچنده گولورم یاواشجا

بیلن یوخ سؤزومو منی قان گؤزل قیز
الیمدن یاپیشیب منه یان گؤزل قیز
کسیلیب اومودوم هامیدان ، اؤلورم
غمیندن اوره‌گیم وئریر جان گؤزل قیز

سنی تانری بیرآن قولاق‌وئر سؤزومه
سنی تانری پای گؤندریب‌دیر اؤزومه
بئله سانما من‌سیز یاشایا بیلرسن 
بونو بیل کی سن ده یانارسان کؤزومه

داها هئچ تاپیلماز سنه تای گؤزل قیز
گؤرورسن حالیمی منی سای گؤزل قیز
داها چوخ قیناما ،یئری وار وئرم جان 
گولنده ، سنه اَل چالیر آی ، گؤزل قیز

سلمان عبدی زاده
yanımdan keçəndə mənə bax gözl qız
baxışla məni yandırıb yax gözəl qız
qaranlıq gecə tək susubdur xəyalım
göyümdən bir ulduz kimi ax gözəl qız

səni hər görəndə ölürəm yavaşca
canımı sən ilə bölürəm yavaşca
şəhər ağladıbdır məni hər yerində
qapızdan keçəndə gülürəm yavaşca

bilən yox sözümü məni qan gözəl qız
əlimdən yapışıb,mənə yan gözəl qız
kəsilib umudum hamıdan
ğəmindən ürəgim verir can gözl qız

səni tanrı bir an qulaq ver sözümə
səni tanrı pay göndəribdir özümə
belə sanma mənsiz yaşaya bilərsən
bunu bil ki sən də yanarsan közümə

daha heç tapılmaz sənə tay gözəl qız
görürsən halımı ,məni say gözəl qız
daha çox qınama,yeri var verəm can
güləndə sənə əl çalır ay , gözəl qız

@salman_abdizadeh

بیر تابوت آرزو ،بیر یازیق شاعیر

بیر تابوت آرزو ،بیر یازیق شاعیر

خیاوان‌لار جانا گلیر بیر_بیر

بیر قوجا ایت کیمی سولنمه‌ده‌یم

گئجه‌لرده پولیس گؤرور ،دینمیر

 

اوره‌ییمدن یئییرلر ایندی منی

دینمیرم سه ، جانیم یامان سیخیلیر

بیر قادین سیزلاییر اوتای کوچه‌ده

بیر کیشی یَل کیمی آشیب ییخیلیر

 

بئینیمی لاختا_لاختا قان بورویوب

یارالی شئعریمی بیلن یوخدور

قورد کیمی آغری‌لار سوکور سینه‌می

شه‌هَری غم بوکوب ،گولن یوخدور

 

بئله گئدسه یوکوم آغیرلاشاجاق

هر گئجه منده بیر ایگید اؤله‌جک

خاطیره کروانی گلیب کئچه‌رک

بیر جوجوق آغلاییب ،بیری گوله‌جک

 

چوخ زامان‌لار یولو چاشیب آزیرام

سانکی هئچ دونیادا ایزیم قالمیر

باخیرام گؤیلره هر آخشاملار

اۇلدۇزوم دا کئچیب داها چالمیر

 

اویونون سونراسین بیلن وار می ؟

بو قه‌در حسرتیم نئجه بیته‌جک ؟

گولله ،قان ،مرمی‌لر دولوب باشیما

بو یاخین‌لار منیم اؤلوب ایته‌جک

 

سلمان عبدی زاده

bir tabut arzu ,bir yazıq şair

xiyavanlar cana gəlir bir_bir

bir qoca it kimi sülənmədəyəm

gecələrdə polis görür ,dinmir

 

ürəyimdən yeyirlər indi məni

dinmirəmsə canım yaman sıxılır

bir qadın sızlayır otay küçədə

bir kişi yəl kimi aşıb yıxılır

 

beynimi laxta_laxta qan bürüyüb

yaralı şerimi bilən yoxdur

qurd kimi ağrılar sökür sinəmi

şəhəri ğəm büküb ,gülən yoxdur

 

belə gedsə yüküm ağırlaşacaq

hər gecə məndə bir igid öləcək

xatirə kərvanı gəlib keçərək

bir cocuq ağlayıb, biri güləcək

 

çox zamanlar yolu çaşıb azıram

sankı heç dünyada izim qalmır

baxıram göylərə hər axşamlar

ulduzum da keçib ,daha çalmır

 

oyunun sonrasın bilən varmı ?

bu qədər həsrətim necə bitəcək ?

güllə, qan ,mərmilər dolub başıma

bu yaxınlar mənım ölüb itəcək

səlman əbdizadə

@salman_abdizadeh

گلقویاق وفاسیز فلکی حئیران

باخما ساچیمیزین آغارماغینا

گَل قویاق وفاسیز فلکی حئیران

من سنی سئویرم ،سن ده سئو منی

قاپیزدان سوووشوم ،هر ساعات ،هر آن

 

تامارزی ساخلاما شن باخیشینا

ایذن وئر قوْلومو سالیم بوینونا

کوچه اورتاسیندا خالقین اؤنونده

حیانی اونودوب ،گیریم قوینونا

 

قوْی نه‌لر دئییرلر ،دئسین‌لر بیزه

دوداغیم اؤپنده بال دوداغینی

اوزون ساچلارینی داراییم ،هؤروم

یاپیشدیر اوزومه آل یاناغینی

 

دَیسین بیربیرینه باخیش‌لاریمیز

قورتارسین اوره‌گین آغری عذابین

اوجادان قیشقیریم، ائل ساغلیغینا

ایچیم گؤزلرینین قوجا شرابین‌

 

کئفله‌نیم آیاقدان باشیما قه‌در

قونشولار دؤیسون‌لر تپیک‌لرینی

سئوگیلی پولیس‌لر صفه دوزولوب

سایغی‌ایلا چالسین‌لار چپیک‌لرینی

سلمان عبدی زاده

baxma saçımızın ağarmağına

gəl qoyaq vəfasız fələki heyran

mən səni sevirəm , səndə sev məni

qapızdan sovuşum hər saat ,hər an

 

tamarzı saxlama şən baxışına

izn ver qolumu salım boynuna

küçə ortasında, xalqın önündə

həyanı unudub ,girim qoynuna

 

qoy nələr deyirlər ,desinlər bizə

dodağım öpəndə bal dodağını

uzun saçlarını darayım hörüm

yapışdır üzümə al yanağını

 

dəysin bir birinə baxışlarımız

qurtarsın ürəgin ağrı əzabın

ucadan qışqırım ,elsağlıqına !

içim gözlərinin qoca şərabın

 

keflənim ayaqdan başıma qədər

qonşular döysünlər təpiklərini

sevgili polislər səfə düzülüb

sayğı ila çalsınlar çəpiklərini

@

salman_əbdizadeh

تانریم چوخ سوسوبسان ،بو قه‌در یئتَر

تانریم چوخ سوسوبسان ،بو قه‌در یئته‌ر

بو گئجه من ایله دانیشاجاقسان

حوزونلو آغریمی مندن ائشیدیب

سن‌ده منیم کیمی آلیشاجاقسان

 

یاپیش اللریمی، اوتور یانیمدا

اوره گیم دولودور ، کؤنولوم یارا

بو قه‌در آغرینی چکه بیلمیرم

سانکی اوره‌گیمدن چکیبلر دارا

 

هئی یازیب پوزورام ،کیمسه ائشیدمیر

اؤزومدن باشقاسی بیلمیر آغریمی

مین بیر حسرتیمی شعریم داشیییر

بو گئجه چوخالیب ،دَلیر باغریمی

 

بو گئجه حیاتین یئکه سیررینی

اؤزوندان ائشیدیب ،بیله‌جه‌یم من

کؤنول دفترینی اَله گؤتوروب

یئرسیز آرزولاری سیله‌جه‌یم من

 

هئچ نه ایسته‌میرم ، هئچ نه دئمیرم

حیاتین هر نه‌یین آتماغیم گلیر

بو گئجه ایسته‌گیم چوخ اوْلمایاجاق

یالنیز دیزین اوسته یاتماغیم گلیر

 

سلمان عبدی زاده

tanrım çox susubsan ,bu qədər yetər

bu gecə mənilə danışacaqsan

hüzünlü ağrımı məndən eşidib

sən də mənim kimi alışacaqsan

 

yapış əlləriimi ,otur yanımda

ürəgim doludur ,könülüm yara

buqədər ağrını çəkə bilmirəm

sanki ürəgimdən çəkiblər dara

 

hey yazıb pozuram ,kimsə eşidmir

özümdən başqası bilmir ağrımı

min bir həsrətimi şeirim daşıyır

bu gecə çoxalıb ,dəlir bağrımı

 

bu gecə həyatın yekə sirrini

özundan eşidib ,biləcəyəm mən

könül dəftərini ələ götürüb

yrsiz arzuları siləcəyəm mən

 

heç nə istəmirəm, heç nə demirəm

həyatın hər nəyin atmağım gəlir

bu gecə istəgim çox olmayacaq

yalnız dizin üstəyatmağım gəlir

.

@salman_abdizadeh

gülə gülə solur adam

یاشام چتین تاپماجادیر

گوله گوله سوْلۇر آدام

گورورسن بیر خیردا سؤزله

گؤزونه‌جک دوْلۇر آدام

 

سینیب ایچینه تؤکولور

بوکولور ،جانی بوکولور

اوره‌ک آغری‌ییب سؤکولور

لاپ یالاندان گولور آدام

گوله گوله سوْلۇر آدام

 

ائل اوبایا قاریشمامیش

آغری‌لارین دانیشمامیش

یاشام‌ایلا باریشمامیش

گؤر نه گونه قالیر آدام

گوله گوله سوْلۇر آدام

 

گاه هایقیریب گاهدان توموب

هارا چاتیب ،نه‌یه اوموب

آرزولارا گؤزون یوموب

اؤزو اؤزون یوْلۇر آدام

گوله گوله سوْلۇر آدام

 

سلمان عبدی زاده

.

yaşam çətin tapmacadır

gülə gülə solur adam

görürsən bir xırda sözlə

gözünəcək dolur adam 

 

sınıb içinə tökülür 

bükülür ,canı bükülür

ürək ağrıyıb sökülür

lap yalandan gülür adam

gülə gülə solur adam

 

el obaya qarışmamış

ağrıların danışmamış

yaşam ila barışmamış

gör nə günə qalır adam

gülə gülə solür adam

 

gah hayqırıb gahdan tumub

haraçatıb, nəyə umub

arzulara gözün yumub

özü özün yolur adam

gülə gülə solur adam

.

@salman_abdizadeh

نه یاخشی آغ ساچیمی یار داراقلاییر گئجه‌لر

غزللی کؤنلومو آغری قوجاقلاییر گئجه‌لر 
گونو، آیی، ایلی هئچ له واراقلاییر گئجه‌لر

هامی یاتیب سا ،منه دویغولار غزل توخویور
سوسورسا گوندوز اتک باش، سایاقلاییر گئجه‌لر

حوزونلو احوالیمی یوخ ، گؤروب، بیلیب، ائشیدن
نه یاخشی آغ ساچیمی یار داراقلاییر گئجه‌لر

داریخمیرام ، سیخیلیب آغریسا اورک ،دؤزه‌رم 
غزل اورک یاراسین دا یاماقلاییر گئجه‌لر

اؤلَردی جان ، بو قَدَر نیسگیله چتین قالماق
قالیرسا ،تانریسی هردن سوراقلاییر گئجه‌لر

سلمان عبدی زاده
ğəzəlli könlümü ağrı qucaqlayır gecələr
günü ,ayı ,ili heç lə varaqlayır gecələr

hamı yatıbsa ,mənə duyğular ğəzəl toxuyur
susursa gündüz ətək_baş ,sayaqlayır gecələr

hüzünlü əhvalımı yox, görüb,bilib,eşidən
nə yaxşı ağ saçımı yar daraqlayır gecələr

darıxmıram, sıxılıb ağrısa ürək, dözərəm
ğəzəl ürək yarasın da yamaqlayır gecələr

ölərdi can ,bu qədər nisgilə çətin qalmaq
qalırsa ,tanrısı hərdən soraqlayır gecələr

@salman_abdizadeh

بوردا بیر قادینین اوره‌گی یانیر ...

اوغورسوز بایقوش‌لار دولوب شه‌هَره 
بوردا بیر قادینین اوره‌گی یانیر 
کیمسه بیلمیر اونو کیمسه ائشیدمیر 
اللری قوْینوندا ،حئیران دولانیر

قیسمتی آیریلیق ،چکدیگی حسرت
آخشاملار اوره‌گی آغری‌ییر یامان
یالقیزلیق بورویوب ائوین یاتاغین
تؤکولور باشینا یاشام‌لا زامان

گاه گولور ،گاه سوسور ، گاه دا آغلاییر 
اینانمیر ناغیلیندان بوراسینی
حیات سئوگیلیسین آلیب الیندن
کیمسه آنلایاجاق می یاراسینی ؟!

بئینینده ساواشیر یقین‌له گومان
گاه یقین تله‌ییر ،گاه گومان ییخیر
ساعاتلار کئچه‌رک داوانین سونو
بیر یئره چاتماییب ،کؤنولون سیخیر

دیل آچیب دانیشیر باغلی پنجره
قادین دور آیاقا ،تانی اؤزونو 
دونیا چوخ یئکه‌دیر ،یولوموز اوزون
ساخلاما اورکده غملی سؤزونو

سئو ، سئویل ، دونیانین قایداسی بودور 
بیری وار ، بیری‌سی اوْلمایاجاق‌دیر 
باغچادان بیر گولو ،باغبان یولورسا
اوندان باشقاسی هئچ سولمایاجاق‌دیر

عؤمور نه‌قه‌در وار سئومک گَرَکیر
تانرینین شئعرینی پوزمایاق گَرک
سئوینجین کَدَرین یئرینی بیلیب
تانری سئومه‌دیگین یازمایاق گَرَک

سلمان عبدی‌ زاده
uğursuz bayquşlar dolub şəhərə
burda bir qadının ürəgi yanır
kimsə bilmir onu ,kimsə eşidmir
əlləri qoynunda ,heyran dolanır

qisməti ayrılıq ,çəkdigi həsrət
axşamlar ürəgi ağrıyır yaman
yalqızlıq bürüyüb evin , yatağın
tökülür başına yaşamla zaman

gah gülür ,gah susur ,gahda ağlayır
inanmır nağılından burasını
həyat sevgilisin alıb əlindən
kimsə anlayacaq mı yarasını ?!

beynində savaşır yəqinlə güman
gah yəqin tələyir ,gah güman yıxır
saatlar geçərək ,davanın sonu_ 
bir yerə çatmayıb, könülün sıxır

dil açıb danışır bağlı pəncərə
qadın dur ayağa, tanı özünü
dünya çox yekədir ,yolumuz uzun
saxlama ürəkdə ğəmli sözünü

sev, sevil , dünyanın qaydası budur
biri var ,birisi olmayacaqdır
bağçadan bir gülü bağban yolursa !
ondan başqası heç solmayacaqdır

ömür nəqədər var ,sevmək gərəkir
tanrının şerini pozmayaq gərək
sevincin kədərin yerini bilib
tanrı sevmədigin yazmayaq gərək

 

@salman_abdizadeh

سیندیراجاغام گؤیون حاصارلارینی

بیر گئجه
سوسموش شه‌هَرین قارانلیق کوچه‌لرینین بیرینده
ائرکک فاحیشه‌لرین ان چوخ دایاندیقلاری قاپینین اؤنونده 
بایقوش‌لارلا گؤز گؤزه اوتوروب
زه‌هَردن داها چوخ آجی داریخمالاریمی فینجانا تؤکوب
ایچه‌جه‌یم منی سئومه‌ین‌لرین ساغلیق‌لارینا
پولیس‌لردن قورخمایاراق
کئفله‌نه‌جه‌یم
آماتور شئعیرلریمی دووارلارا سویله‌یه‌رک
او آن منی گؤرَن اولاجاق سا ،دیکسینمه سین 
بلکه‌ده منیم تام آییق چاغلاریم ائله او گئجه اولاجاق 
یالقیزلیغیمی آچیق پنجره‌لرله بولوشوب
یئرسیز آرزولاریمی یاندیریب
قیزیشاجاغام آلوووندا
سیله‌جه‌یم بئینیمدن لاختالانمیش فیکیرلریمی
اَن آزی
کَپنک‌لرین حیات طرزینی خاطیرلاییب
عوصیان ائده‌جه‌یم بوتون اینانجلاریمین قارشیندا
من‌لیگیمین بیر آزینی کوچه‌لردن 
بیر آزینی دا بایقوشلارین باخیشلاریندان آلیب ،
پوزاجاغام منطیق قایدالارینی
سیندیراجاغام یاساقلیغین سینیرلارینی
اوچورداجاغام تَزه دیل آچمیش خیال‌لاریمی
اوچاجاغام باغلی قانادلاریم‌لا 
اوجا دویغولاریما دایاناراق
اوچماق ایسته‌ین کیمسه وارسا 
آییق یاتسین
یاخین گئجه‌لرین بیرینده
سیندیراجاغام گؤیون حاصارلارینی

سلمان عبدی زاده

bir gecə
susmuş şəhərin qaranlıq küçələrinin birində
erkək fahişələrin ən çox dayandıqları qapının önündə
bayquşlarla göz gözə oturub
zəhərdən daha çox darıxmalarımı fincana töküb
içəcəyəm məni sevməyənlərin sağlıqlarına
polislərdən qorxmayaraq 
keflənəcəyəm
amator şeirlərimi dovarlara söyləyərək
o an məni görən olacaqsa ,diksinməsin
bəlkədə mənim tam ayıq çağlarım elə o gecə olacaq
yalqızlığımı açıq pəncərələrlə bölüşüb
yersiz arzularımı yandırıb
qızışacağam alovunda
siləcəyəm beynimdən laxtalanmış fikirlərimi
ən azı
kəpənəklərin həyat tərzini xatırlayıb
üsyan edəcəyəm bütün inanclarımın qarşında
mənligimin bir azını küçələrdən
bir azını da bayquşların baxışlarından alıb
pozacağam məntiq qaydalarını
sındıracağam yasaqlığın sınırlarını
uçurdacağam təzə dil açmış xəyallarımı
uçacağam bağlı qanadlarımla
uca duyğularıma dayanaraq
uçmaq istəyən kimsə varsa 
ayıq yatsın
yaxın gecələrin birində
sındıracağam göyün hasarlarını

@salman_abdizadeh

سحر یاریر گئجه‌نی ،گَل بونا اینان غزلیم

کوسوبدو دویغولاریم ،سیزلاما دایان غزلیم 
چوخ اولدو غم‌لریمیز ،شن‌لیگه بویان غزلیم

آچیقدی پنجره‌میز ،تانری‌ایلا قوْل بوْیونام
گونش‌له بیرلَشه‌رَک ،کونلومه جالان غزلیم

داریخما دؤز هله‌لیک، یوْل اوزوندو ، یورما منی
ای آرزولاردا یانیب ،بختیمه اومان غزلیم

بیز ایسه آرخایینیق ، وار اوغورلو گون‌لریمیز
چالیش یقین‌لریمیز اوْلماسین گومان غزلیم

سیزیلتی واختی دئییل ، باخ، یئییرلر حاققیمیزی !
چک ایندی دویغو قیلینجین ،ائدک طوفان غزلیم

بوگون سسین دویورام ،ظولم ائوی ییخیلمادادیر 
سحر یاریر گئجه‌نی ، گَل بونا اینان غزلیم

سلمان عبدی زاده

küsübdü duyğularım ,sızlama,dayan ğəzəlim
çox oldu ğəmlərimiz ,şənligə boyan ğəzəlim

açıqdı pəncərəmiz, tanrı ila qol boyunam
günəşlə birləşərək, könlümə calan ğəzəlim

darıxma döz hələlik ,yol uzundu ,yorma məni
ey arzularda yanıb ,bəxtimə uman ğəzəlim

biz isə arxayınıq ,var uğurlu günlərimiz
çalış yəqinlərimiz olmasın güman ğəzəlim

sızıltı vaxtı deyil ,bax , yeyirlər  haqqımızı
çək indi duyğu qılıncın ,edək tufan ğəzəlim

bu gün səsin duyuram ,zülm evi yıxılmadadır
səhər yarır gecəni ,gəl buna inan ğəzəlim

@salman_abdizadeh
 

منیم آغری‌لاریم

 

منیم آغری‌لاریم (شئعیر توپلوسو )

یازار : سلمان عبدی زاده

تبریز _ انتشارات اختر 

.

داریخمایین آی ائلیم ،قیش کئچیر ،باهار گله‌جک 
بنؤوشه‌لر آچاراق ،دورنا ایلا سار گله‌جک
. 
شه‌هر شه‌هر دوْلانیب هاممی‌یا خبر یئتیرین 
گئجیکمیش آرزولاری چاتدیران قاطار گله‌جک

دئیین آداخلی قیزا ،قیرمیزی دوْنۇن گئیسین
سحر آچیلمادادیر ،یار الینده نار گله‌جک

سپین اورک‌لریزه سئوگی بذرینی قات_قات
بو یئرده وارسا حیات ،سئوگیمیز یاشار گله‌جک

آنام یازیق دئدی هاااا ،سلمانیم داریخما دایان 
زامان سیزه گوله‌رک ، یوللاریز  هامار گله‌جک

سازاقلی پنجره‌لردن چکیلمه‌یین قیراغا 
داریخمایین آی ائلیم ،قیش کئچیر باهار گله‌جک .

سلمان عبدی زاده " منیم آغری‌لاریم " غزل ۱۱

darıxmayın ay elim ,qış keçir, bahar gələcək
bənövşələr açaraq ,durna ila sar gələcək

şəhər şəhər dolanıb hammıya xəbər yetirin 
gecikmiş arzuları çatdıran qatar gələcək

deyin adaxlı qıza ,qırmızı donun geysin
səhər açılmadadır ,yar əlində nar gələcək

səpin ürəklərizə sevgi bəzrini qat_qat
bu yerdə varsa həyat ,sevgimiz yaşar gələcək

anam yazıq dedi haa ,səlmanım darıxma dayan
zaman sizə gülərək ,yollarız hamar gələcək

sazaqlı pəncərələrdən çəkilməyin qırağa
darıxmayın ay elim ,qış keçir ,bahar gələcək

@salman_abdizadeh

آتا

بیر نوسخه الینده ،مأیوس دولانیر 
یاناغی قیزاریب ،اوره گی کیمین
باخیشی هایقیریر گلیب گئده‌نه
آمما یوخ دوشونن آغریسین غمین 

تیلفونو سسله‌نیر ، اوره‌گی چؤکور
الو ، آی آتا جان هایاندا قالدین ؟
تئزول گل یانیما ،حالیم یاماندیر 
چوخدان‌دیر  گئدیبسن، داوامی آلدین ؟

بالا هئی سوروشور ، آتا دینمه‌ییر 
سانکی هئچ یازیغین دیلی یوخویموش
گؤز یاشین توکه‌رک، ازیلیر ،سینیر 
بللی‌دیر آغریسی داها چوخویموش

غم یئمه آتاجان ،آللاه کریم‌دیر
قاییت گل یانیما ،یئنه دانیشاق
فله‌یین وئردیگی جزالارینی
بیرلیکده چکیبَن ،بیرگه آلیشاق

آز زامان سوووشوب ،ایش‌لر دوزلدی
آتانین غوصه‌سی غمی قالمادی
دووره‌سین آلدیلار ،گلیب کئچن‌لر 
اوره‌گی دایانیب ،داها چالمادی 

سلمان عبدی زاده
bir nusxə əlində ,məyus dolanır
yanağı qızarıb ürəgi kimin
baxışı hayqırır gəlib gedənə 
amma yox düşünən ,ağrısın ,ğəmin

tilfunu səslənir ,ürəgi çökür
əlo,ay ata can,hayanda qaldın?
tezol gəl yanıma,halım yamandır
çoxdandır gedibsən ,davamı aldın ?

bala hey soruşur ,ata dinməyir
sanki heç yazığın ,dili yoxuymuş 
göz yaşın tökərək ,əzilir ,sınır 
bəllidir ağrısı daha çoxuymuş

ğəm yemə atacan,allah kərimdir
qayıt gəl yanıma, yenə danışaq
fələyin verdigi cəzalarını
birlikdə çəkibən ,birgə alışaq

az zaman sovuşub ,işlər düzəldi
atanın ğussəsi ğəmi qalmadı
dövrəsin aldılar gəlib keçənlər
ürəgi dayanıb ,daha çalmadı

@salman_abdizadeh

بسندگی زبان فارسی

#بسندگی_زبان_فارسی
#سلمان_عبدی_زاده
.
بعد از چهل سال قانون شکنی از طرف مجریان قانون (اجرایی نشدن اصل پانزده قانون اساسی یا همان تدریس زبان مادری ) ، حال به جای اینکه از ملت نجیب و خویشتن‌دار عذر خواهی کرده و حق و حقوق قانونی‌مان را با امکانات مناسب و در خور ،در اختیارمان بگذارند ، تبر به دست دنبال ریشه میگردند و مقاصد خطرناکی را دنبال میکنند که جز ایجاد تفرقه ،کینه و نفرت ،چیزی به دنبال نخواهد داشت 
چند وقت پیش بنده نیز طبیعتا به سبب فضای مجازی شاهد ناراحتی و عصبانیت دوستانی بودم که میگفتند ، " رضوان حکیم‌زاده "معاون آموزش ابتدائی وزارت آموزش و پرورش طرحی را مطرح کرده اند که طبق آن ،« چنانچه بچه‌های غیر فارس زبان ،قبل از ورود به مدرسه و حتی از سن سه چهار سالگی ،زبان فارسی را یاد نگرفته باشند ،اجازه ورود به مدرسه را نخواهند داشت ! 

بنده اطلاع دقیقی ندارم که این شخص با این دیدگاه کاملا غیر تخصصی ، هیجانی و فاشیستی ،چطور و چگونه بوده که توانسته در سیستم حساسی چون وزارت آموزش و پرورش ،صاحب سمت شده و این اختیار را هم داشته باشد که بتواند اینطور راحت و بدون اینکه به عواقب حرفهایش فکر کند ،چنین پیشنهاد مزخرفی را ارائه دهد ، البته با مشاهده این قضایا ،راحت میشود به دلایل ضعف در آموزش و پرورش کشور هم پی برد و طبیعتا اگر از اشخاص متخصص و کاردان بهره می بردند ،شاهد چنین افاضاتی هم نبودیم ، چرا که هر شخصی که چند صفحه در مورد اهمیت زبان مادری و تفاوتهای ساختاری در زبان‌ها مطالعه داشته باشد ، هرگز چنین پیشنهادی را به زبان نمی آورد 

و بدتر اینکه تازگی ها خبرهای بدی به گوش می رسد و ظاهرا اشخاصی پیدا شده‌اند که بدون توجه به عمق فاجعه ،سعی بر اجرای این طرح مسخره و غیر انسانی دارند

لذا با توجه به فعالیتهایی که در حوزه ادبیات داشته ام و اندک اطلاعی از تنوع زبانها و تفاوت ساختاری شان دارم و نیز جایگاه زبان مادری و اهمیتش را تا حدودی درک کرده‌ام ، با قاطعیت هر چه تمام‌تر ،سلب زبان مادری هرکس را سلب زندگی آن شخص و صد البته،کاملا غیر ممکن و دور از اخلاق انسانی میدانم 
و اینکه این طرح هیچ مزیتی برای سلامت کودکان ندارد و تنها هدفش از بین بردن زبان مادری‌ست و حتی سلامت روحی و روانی کودکانمان را نشانه رفته و در صورت اجرا « که البته به هیچ عنوان چنین نخواهد شد » موجب بروز اختلالات روحی روانی در بچه ها و حتی بزرگترها خواهد شد 
(البته این را که زبان مادری فقط رساندن پیام نیست ،همه میدانند و بازگو کردن اهمیتهای زبان مادری و باید و نبایدهایش بماند برای فرصتی دیگر ،چرا که این موضوع گسترده تر از این حرف هاست که در چند سطر بتوان مطرح کرد ) 
ما علی رغم دانستن قدرت و میزان اعتبار زبان مادری‌مان ،زبان فارسی را به عنوان زبان رسمی قبول داریم ، اما ، آتا آنالاریمیزدان بیزه قالان ضرب المثل بئله دئییر کی ، (سنی چوخ ایسته‌ییرم ،آمما اؤزومو سن‌دن ده چوخ ایسته‌ییرم )

حال پیشنهادی که بنده به مسئولان مربوطه دارم این است که ،  قوانین و خواسته‌های مراکز معتبر بین‌المللی در مورد اقوام و مللت‌ها را که در بیشتر کشورها هم به راحتی در حال اجرا هستند ،بخوانید و درک کنید و البته در همه زمینه‌ها  ،تا شاهد اتحاد و دوستی‌های روز افزون و پایدار باشیم ان شاالله 

سلمان عبدی زاده
@salman_abdizadeh

اوشاق شعری

 

آی منیم یولداشلاریم

 

سئوگیلی دیلداشلاریم

تک گزیب دولانمایین

غم‌لره بولانمایین

گلین وئرک ال_اله

بورا سالاق ولوله

دئییب گولوب اوینایاق

هئچ کیمی تک قویمایاق

کوسن‌لرله باریشاق

آنا دیلده دانیشاق

بیزه جان‌دیر دیلیمیز

یاشاسین بو ائلیمیز

سلمان عبدی زاده

ay mənim yoldaşlarım

sevgili dildaşlarım

tək gəzib dolanmayın

ğəmlərə bulanmayın

gəlin verək əl_ələ

bura salaq vəlvələ

deyib gülüb oynayaq

heç kimi tək qoymayaq

küsənlərlə barışaq

ana dildə danışaq

candır bizə dilimiz

yaşasın bu elimiz

səlman əbdizadə

@salman_abdizadeh

بَیاز بزه‌دیک

کونول داریخدی ،خیالدا ، دولو آراز بزه‌دیک
آرازلی کونلوموز ایچره چالارقی ساز بزه‌دیک

باخیردی تانری حوزونلو ، گؤی ایله یئر آراسی
داریخماسین دئیه اونلا قورو ناماز بزه‌دیک

بئشیکده ییرغالانیردی تام آرزی‌لار هله ده
بیز آرزی‌لار ائوینه لاپ دوْلۇ جاهاز بزه‌دیک

کونول قوشو ،اوره‌گی قان ،قونوردو باخچامیزا
بیز ایسه هر سحر آخشام ،اؤنونده قاز بزه‌دیک

باغین آغاج‌لارینی بیر‌به‌بیر کسیب یئدیلر
بنووشه‌لر اوتانارکن ،یالانچی یاز بزه‌دیک

بوگون دؤیوشدوم اؤزومله ،دئدی دایان " سلمان "
بیزه یامان گونو چاتمیشدی ،بیز بَیاز بزه دیک
.
könül darıxdı ,xəyalda dolu araz bəzədik
arazlı könlümüz içrə ,çalarqı saz bəzədik

baxırdı tanrı hüzünlü ,göyilə yer arası
darıxmasın diyə ,onla quru namaz bəzədik

beşikdə yırğalanırdı tam arzılar hələdə
biz arzılar evinə lap dolu cahaz bəzədik

könül quşu ürəgi qan ,qonurdu baxçamıza
biz isə hər səhər axşam önündə qaz bəzədik

bağın ağaclarını bir bə bir kəsib yedilər
bənüvşələr utanarkən yalançı  yaz bəzədik

bu gün döyüşdüm özümlə ,dedi dayan " səlman "
bizə yaman günü çatmışdı ,biz bəyaz bəzədik

səlman abdizadeh

ایندی سونرامیزی یازماق گرکیر

یاندیریر سینه‌می ، یانیقلی آه‌لار
نه زامان اوزوموز گوله‌جک بیزیم ؟!
نه‌قدر آرزیمیز دیلک‌لریمیز
اورکده بوغولوب ،اؤله‌جک بیزیم

بورا بوتون دومان ،بورا بوتون چن
بوردا تام اورک‌لر قانا بله‌نیر
 بیری وار تاپماییر ،قورو چؤره‌گین
بیریسی مینینین وارین یله‌نیر

بوردا دۇیغۇلارین جانی قاناییٛر
بو یئرده عدالت چکیلیر دارا
آتالار گؤینه‌ییر ،آنالار یانیٛر
باخ گور هارالاردان ، یئتیشدیک هارا

صاباحی تاپماقا آییلاق گرک
آجی اویخولاری پوزماق گرَکیر
کپه‌نک ،شمع‌دن ، چوخ سؤز دئییلیب
ایندی سونرامیزی یازماق گرَکیر

سلمان عبدی زاده
yandırır sinəmi, yanıqlı ahlar
nə zaman üzümüz güləcək bizim ?
nəqədər arzımız ,diləklərimiz
ürəkdə boğulub ,öləcək bizim ?

bura bütün duman ,bura bütün çən
burda tam ürəklər ,qana bələnir
biri var tapmayır quru çörəgin
birisi mininin malın yələnir

burda duyğuların canı qanayır
bu yerdə ədalət çəkilir dara
atalar göynəyir,analar yanır
bax gör haralardan yetişdik hara !

sabahı tapmaqa ayılaq gərək
acı uyxuları pozmaq gərəkir
kəpənək şəmidən çox söz deyilib
indi sonramızı yazmaq gərəkir

@salman_abdizadeh

فیکریمی قاتیب دیر دیله نن قادین

بۇ گۆن کدر آلیٛب تام اۆره‌گیمی
فیکریمی قاتیب‌دیٛر ،دیله‌نن قادیٛن
امینم چتین‌دیر اونا بۇ یاشام
ایسته‌گین آتیٛب‌دیٛر دیله‌نن قادیٛن
فیکریمی قاتیٛب‌دیٛر، دیله‌نن قادیٛن

اۆره‌گی دۇلۇدۇر ،گۆن‌لری قارا
گۆل کیمی ازیلیب ،کۆنۆلۆ یارا
آغیٛر نیسگیلینه تاپماییٛر چارا
گؤر هارا چاتیٛب‌دیٛر ،دیله‌نن قادیٛن
فیکریمی قاتیٛب‌دیٛر ،دیله‌نن قادیٛن

اۇتانا اۇتانا ،باخیٛردیٛ یئره !
کئفلی تک بۇلانیٛب ،آخیٛردیٛ یره
عزتین،حؤرمتین ، یاخیٛردیٛ یئره
نه‌یین می ساتیٛب دیٛر، دیله‌نن قادیٛن ؟!
فیکریمی قاتیٛب‌دیٛر دیله‌نن قادیٛن

سوْیۇق بیر کوچه‌ده ،اۇزانیٛب قادیٛن
بیلن یوخ نئچه‌دن ،اۇزانیٛب قادیٛن
بلکه‌ده گئجه‌دن ، اۇزانیٛب قادیٛن
چوْخ آغیٛر یاتیٛب‌دیٛر دیله‌نن قادیٛن
فیکریمی قاتیٛب‌دیٛر دیله‌نن قادیٛن

سلمان عبدی زاده
@salman_abdizadeh

سلمان عبدی زاده . بیوگرافی

1362 اینجی ایلده هشتری نین قره سققل کندینده دونیایا گؤز آچدیم
آلتی آی دان چوخ عومروم دن کئچمه میشدی ، آنامین دوغما شه هری ، سراسکند(هشترود) بؤلگه سینه کؤچدوک،
آتام سونرالار رعیت چیلیک دن اَل چکیب  سراسکندین دالی خیابان آدلانان بازارچاسیندا چیلینگارلیقا باشلادی
نئچه ایل یاشادیق ،آنجاق دوققوز یاشدان آرتیق یوخومودو ،آنام دونیاسین دئییشدی و آتام قالدی یالقیز، دوققوز اوشاقلا، دؤرد قارداش، بئش باجی  
البت من سونرالار اؤلومون نه اولدوغونو باشا دوشدوم
آتام بیزیم اوچون هم آتا اولدو هم آنا
دوققوز کیلاس درس اوخودوم ،آمما داها اوخوماغی او زاماندا و او حالدا لازیم بیلمه دیم،
آنجاق قاباق ایللر درس اوخوماغی بیلمه مک لیک دن یاخشی سانماسایدیم دا ، سونرالار ساوادین نه اولدوغونو باشا دوشموشدوم و هرچاغ بیر شئی ایتیرن آداما اوخشاییردیم کی گؤزو درس ده ،مکتب ده قالمیشدی
1385 اینجی ایلده آتام دا بیر حزینلی یاشامین قورتولوشونا راضی لشیب دونیاسین دئییشدی،
1387 اینجی ایل قونشو قیز ایله ائولندیم
، ایندی ده سراسکندین کورگنه محله سینده یاشاییریق
و ایسته سم کی بیر معلوم اولان تاریخی ،شعرایله علاقه باغلاماغیما آرایا گتیرم ،منیم اوچون چتین اولاجاق ، نییه کی من هر چاغ شعر اوخویوب و شاعیرلری آلقیشلایاردیم ،اؤزللیک له اوستاد شهریار ،علی آقا واحد ، استاد کریمی ،  البت اؤز تورک شاعیرلریمیزدن ائله تانیمازدیم ،
حدود 1392 اینجی ایلدن باشلادیم شعر یازیب اوخوماغا و هله ده اوخویورام بلکه بیر گون ائلییه بیلم یاخشی یازماغی اؤیره نه بیلم
و یولداشلاردان بیر ایکی سی شعرلریمین چاپا وئرمه یینی اؤنم لی بیلمیشدیرلر ، آنجاق من هله لیک اوخویوب یازماغی یئترلی گؤرورم
اولسون کی بیر گون البت اگر عومور اولسا و اجل آمان وئرسه بیر سؤزلری تاپیب یازام و اوخویانلارینا یئتیرم
یاشاسین بوتون اینسانلار 🌹
.
سؤزوم قلمدن آخارکن، قمه بولانمادادیر
سئوینج اوزاقلارا کؤچموش، گؤزوم سولانمادادیر

اورک ده قان گئیینیب دیر، سؤزون کیمی بیله جک
علاجسیزام کی اومودلا جانیم دولانمادادیر

گلیش،گئدیش، باخیشیم دا، بوتون اؤلوم قوخویور
و داملا داملا جانیم دیر بئله تالانمادادیر

فلکده گؤزلرین اؤرتوب، اوتانماغی اونودوب
کدر،حوزون، قمی هرگون، منه قالانمادادیر

باشا دوشنمیرم ایندی، سؤزو نه دیر یاشامین
نه قدری جان منه واردیر کی هئی جالانمادادیر
.
سلمان عبدی زاده
.
و تلگرامدادا بو لینک دن یازیلاریمی اوخویا بیلرسینیز
وار اولون عزیزلر
@salman_abdizadeh

آپاردی طاقتیمی ،چوخ اوزون قارا گئجه لر

آپاردی طاقتیمی چوخ اوزون قارا گئجه لر

منی بلایه سالیب ،هئی وورور یارا گئجه لر

 

یارالی جانیمیله ،چوخ گووندیییم چاغدا

آپاردی گونلریمین حیسسینی هارا گئجه لر

 

یانا یانا گزیرم ،عومرومون کوچه باغینی

آغاجلارین هامیسی،اوخشاییر نارا گئجه لر

 

گوناهیم ایندی نه دیر،محکوم اولموشام نه لره

چکیبدی وارلیغیمین آنلامین دارا گئجه لر

 

بیلنمیرم نه اولوب ،یانماسی نه دیر اوره یین

تاپیلماییب من اوچون ،دردیمه چارا گئجه لر

 

سحر آچیلمادادیر آمما فایداسیز ، بیلیرم

جانیم چیخیر،اومودوم ،بیرقالیب تارا گئجه لر

(سلمان عبدی زاده)

apardi taqətimi çox uzun qara gecələr
cani bəlayə salıb hey vurur yara gecələr

yarali canimilə çox güvəndigim çağda
apardi günlərimin hissini hara gecələr

yana yana gəzirəm ömrümün küçə bağıni
ağacların hamısi oxşayır nara gecələr

günahim indi nədir məhkum olmüşam nələrə
çəkibdi varlığımın anlamın dara gecələr

bilənmirəm nə olub yanmasi nədir ürəyin
tapılmayıb mən üçün .dərdimə çara gecələr

səhər açılmadadır amma faydasız.bilirəm
canım çıxır umudum. bir qalıb tara gecələr
( səlmsn əbdizadeh)

مراغانین ادبی انجمنی نه قوناق اولموشدوق کی استاد مقدسی ایله گوروشوب و عزیز ، حورمتلی شاعیرلریله تانیش اولدوق . هامیسینا جان ساغلیقی آرزیلاییرام 
ساغدان . آقای فتاحی . استاد مقدسی . آقای شیری پور بنده و آقای اشرفی

                      

 

طبع گلمیر ، اوره یین قانی آخیر دفتریمه

طبع گلمیر ، اوره یین قانی آخیر دفتریمه

دایانیب ایندی قلم ، غملی باخیر دفتریمه

 

باشا دوشمور نه یازیر،بیلمه ییر هئچ سؤزلرینی

هرنه قدری چالیشیر،غوصه یاخیر دفتریمه

 

صید اولموش فره لر تک ،قفسیم دن دینیرم

گؤرورم منله اولان ظولم شاخیر دفتریمه

 

یازیرام هر نه اورک منله دئییر سؤزلرینی

بیلمیرم کیم باخاجاق بوردا پاخیر دفتریمه

 

لوح و تندیس منیم شأنیمه گلمیر نه دئمک

 قالاجاق گؤزلریمین یاشی آخیر دفتریمه

سلمان عبدی زاده

təbi gəlmir ürəyin qani axır dəftərimə

dayanıb indi qələm ğəmli baxır dəftərimə

başa düşmür nə yazır.bilməyir heç sözlərini

hər nə qədri çalışır ğussə yaxır dəftərimə

seyd olmuş fərələr tək qəfəsimdən dinirəm

görürəm mənlə olan zülm şaxır dəftərimə

yazıram hər nə ürək mənlə deyir sözlərini

bilmirəm kim baxacaq burda paxır dəftərimə

loho təndis mənim şənimə gəlmir nə demək

qalacaq gözlərimin yaşi axır dəftərimə

səlman əbdizadeh